سلسلة مقالات:

هيه جت كده واللي عنده كلمة يلمها ١

هيه جت كده واللي عنده كلمة يلمها ١

بقلم/ عبد العظيم جاد عبد العزيز
مصر : ۲۹-۳-۲۰۱۳ - ۹:۲۸ ص

في ذكرى الثورة

ذكرى ثورة إيه ومين على مين وأسئلة ما لهاش نهاية

أنا اللي فاكره بحق وصحيح في يناير كانت البداية

يوم ما قام الشعب بأطيافه بهبة طالب من الله العناية

ينصره على الفاسدين والمرتشين واللي معيشنه علي الجراية

ومقسمين خيرها على قلة منهم بموافقة سكان السراية

وغلط الثوار وسابوا مواقعهم فبل ما تنتهي الرواية

وركب علي الثورة اللي ركبوا ما انتوا عارفين الحكاية

نسأل الله النجاة من اللي في الوش مراية وفي القفا سلاية!

 

تساؤل

الشهر يناير واليوم خمسة وعشرين

هبت على الساحة ثورة شعب على حق ويقين

إتجمعوا على قلب راجل واحد متعاهدين

لهم مطالب محددة بيها متمسكين

صحونا من عز نومنا وغفلة السنين

الكل صف واحد ما عدش فيه غايبين

وبيصرخوا صرخة واحدة، صرخة أسد في عرين

التغيير مطلبهم والشرعية ومحاكمة الفاسدين

وفي عيد ميلاد الثورة بسأل المحتفلين

صحيح الثورة إتسرقت؟ طب اللي سرقها مين؟!

هي جت كده واللي عنده كلمة يلمها ٢

هي جت كده واللي عنده كلمة يلمها ٢ - آهات

بقلم/ عبد العظيم جاد عبد العزيز
مصر : ۲-٤-۲۰۱۳ - ۱:۱۲ م

يا مركب العمر دابت حبال صواريكي

مش عارفة ترسي علي بر أمان يحميكي

البحر أمواجه الغدر والخسة أشكال

متربصين لحظة يأس يكلوني ويكلوكي

 

آدي مستند يثبت إني فلان

وآدي مستند يثبت أن لي مكان

عيشة غلب وغياب للأمن والإنتماء

أتحداك أن تثبت أنني إنسان

 

آدي سنة راحت بخيرها وشرها

الشر فيها كتر والخير قل منها

وندعي أن الجديدة تكون فاتحة خير

علي شعوب الأرض تحب بعضها

 

الأولى آه والتانية آه والتالتة بين البينين

الأولي آه من حكم أنحس من غراب البين

والتانية آه من نظام فاسد قاهر حقير

والتالتة آه من شعب مغلول اليد والرجلين

هي جت كده واللي عنده كلمة يلمها ٣

هي جت كده واللي عنده كلمة يلمها ٣

بقلم/ عبد العظيم جاد عبد العزيز
مصر : ۱۳-٤-۲۰۱۳ - ۵:٤۳ م

الندابة

الوحايد نامت والانصاص قامت قومتها يا عمي

منهم اللي غاوي قرارات ملغية وسفر وخطب يا همي

ومنهم اللي باع تاريخه واشترى السلطة يا ولداه

ومنهم تخصص تصريحات مضروبة مضللة يا غمي

وفيهم بتاع التجارة والبزنس والتكشيرة بس سمي

وسيدهم بتاع الخلافة والسمع والطاعة والجاه

وفيهم تخصص مبررات يطلع الأرنب من كمي

واللي بيعشق دويلة خليجية ويقولها يا أمي

ومصر صابرة ومتحملة مطلعتش منها الآه

مستنية اللي يحط الأمور في نصابها وا جيشاه

هي جت كده واللي عنده كلمة يلمها ٤

هي جت كده واللي عنده كلمة يلمها ٤

بقلم/ عبد العظيم جاد عبد العزيز
مصر : ۲۷-٤-۲۰۱۳ - ۱۰:۵۳ ص

يا فرحة ما تمت

دورت على التاريخ لقيته واقف بنفسه في التحرير

ومعاه كل رجالته وكتابه وأسرة التحرير والتصوير

بيسجلوا للزمن اللي جاي ثورة الحق والتنوير

ثورة شباب إفترش الأرض وهجر نوم السرير

شباب ثابت علي كلمة واحدة إرتضى بالإعتصام تعبير

لا طالب ترضية ولا تسوية ولا حتى كلمة تقدير

ملوش غير مطلب أساسي وحيد هو مطلب التغيير

تغيير القهر والفساد والظلم وتحرير الشعب الأسير

وعزل زبانية السلطنة وأعوانهم وأمنهم وإسقاط الأمير

خضعوا لكل ألوان القمع ما بين تهديد وتحذير

وهجوم أوباش البشر المأجورين مع الجمال والحمير

لكن ثبتت الفئة المؤمنة ومعاهم رب نصير

وسالت دماء الشهداء زكية لها أريج وعبير

شحنت بقوة باقي الشباب كشحن العلم والنفير

وحاول الأمير بعناده يناور مناورة الرمق الاخير

وكانت مناورته القشة اللي قصمت ظهر البعير

لقي نفسه وعياله ورجالته في وضع جد خطير

فأعلن تنحيته وسلم السلطة مجبر للجيش الكبير

وبقي الحلم حقيقة وربك على كل شئ قدبر

وترك الشباب مكانهم قبل ما يتم الفصل الأخير

وركب على الثورة المدعين بالضلال ومن غير حق وبالتزوير

نسأل الله السلامة والخير لمصرنا إنه اللطيف الخبير

هي جت كده واللي عنده كلمة يلمها ٥

هي جت كده واللي عنده كلمة يلمها ٥ - غربة

بقلم/ عبد العظيم جاد عبد العزيز
مصر : ۲٤-۵-۲۰۱۳ - ۹:۱۸ ص

أنا عايش في مصر بس مصر وحشاني..

حاسس بغربة وأنا في وسط أهلي وخلاني..

طعم المرار في حلقي مع قولة آه ياني..

الناس مش الناس كلهم شكل تاني..

الضحكة غابت وسألت ليه ولا رد جاني..

والفصايل كترت وكل فصيل يتمنظر علي التاني..

والقيادة تاهت ما بين ريس وسلفي وعلماني..

وكل يوم وزير جديد ونشيل الأولاني..

 الخبرة غايبة وأهل الثقة هي اللي حاكماني..

وبقت سويقة خطف وسرقة وأمن سلطاني..

يا مصر ثوري بشبابك وجيشك وإصرفي أحزاني..

وإثبتي إن اللي بناكي حلواني مش فسخاني..

هي جت كده واللي عنده كلمة يلمها ٦

هي جت كده واللي عنده كلمة يلمها ٦ - تمرد

بقلم/ عبد العظيم جاد عبد العزيز
مصر : ۲۲-٦-۲۰۱۳ - ۲:۱۳ م

أنا متمرد إذاً أنا موجود

متمرد علي حاجات كثيرة ملهاش حدود

منها الكذب وعدم تنفيذ الوعود

ومنها التدين الزائف ومخالفة العهود

ورياسة مأمورة ماليها نفع ولا مردود

وتمكين الأهل والعشيرة وغيرهم مرفود

وسيادة الدكتاتورية وباب الديمقراطية موصود

وخطاب التهديد والوعيد زي الرعود

وغياب الأمن والأمان وطغيان الجحود

كلنا نازلين وحنشارك في اليوم الموعود

حنجري نهر الحرية ونهد السدود

يا مصر يا حبلي آن أوان المولود

مولود السلطة الشعبية والحب الودود

هي جت كده واللي عنده كلمة يلمها ٧

هي جت كده واللي عنده كلمة يلمها ٧ - الإفساد

بقلم/ عبد العظيم جاد عبد العزيز
مصر : ۸-۷-۲۰۱۳ - ۱۱:۳۱ ص

إخوانا المسلمين أقصد إخوانا المسلحين

إنتوا بس المسلمين وإحنا كفرة ملحدين؟

ده تصنيف قاعد في رقبتكم إلى يوم الدين

بتتمسحوا في الخلافة خلافة إيه يا مدعين

الخلافة في كتب السلف بس للراشدين

إيديكوا متلطخة بدم الشباب والأطفال والمسنين

عايزين تسرقوا وطن عزيز على كل المصريين؟

كان غيركم أشطر في مصر مدفونين

مصر بجيشها وشعبها مسلمين ومسيحيين

متجمعين في خندق واحد ضد الموتورين

يارب أنصرنا بفضلك علي القوم المفسدين

هي جت كده واللي عنده كلمة يلمها ٨

هي جت كده واللي عنده كلمة يلمها ٨ - كنا وكانوا

بقلم/ عبد العظيم جاد عبد العزيز
مصر : ۲٦-۷-۲۰۱۳ - ۷:٤۸ م

مش مصر كانت كفار قبل التنظيم ما يحكم بالإسلام

حكم التنظيم وكلنا وحدنا بالله وبقينا تمام التمام

وكسرنا أصنامنا وأكلنا بعضهم ودخلنا دنيا التمكين والأوهام

وانتظرنا نشوف الإسلام الحق بيطبق بعد ما كنا نيام

لقينا الأهل والعشيرة متصدرين المشهد وباقي الشعب هوام

مسكوا مفاصل الدولة بأهل الثقة من غير خبرة وعلام

يا السمع والطاعة العمياء لهم يا إنت كافر بتحارب الإسلام

دستور تفصيل ونيابة عامة ملاكي وقوانين قهر وإرغام

ودعاة ومشايخ قتلة وشباب مغيب مسير بجهل كالأغنام

وهب شباب تمرد لتصحيح الوضع وجمع الملايين في أيام

طلع طوفان البشر من الشعب الحر وطلب تحطيم الأصنام

إستجاب الجيش وسانده الشرطة والقضاة والأزهر بقيادة الإمام

والمثقفين ومعظم الأحزاب والتنظيمات الثورية والحر من الإعلام

يارب كمل جميلك علينا وترجع مصر الحبيبة ونعيش في وئام

الشرعية

هي جت كده واللي عنده كلمة يلمها ٩ - الشرعية

بقلم/ عبد العظيم جاد عبد العزيز
مصر : ٤-۸-۲۰۱۳ - ۱۰:٤۵ ص

شرعي وشرعية وصندوق كلمات وضعية

من صنع البشر مش نصوص الاهية

الشرعية الحقيقية بتفرضها الجموع البشرية

مش فصيل لخدمة مصلحته الشخصية

الشرعية مش بالغلبة بالحق والمفهومية

بالتدبير والتنوير والرأي السديد بالأغلبية

تقطع طريق وتروع وتقول شرعية

غيبتم عقول الناس زي الماسونية

سمع وطاعة القطيع لقيادة وهمية

بتخطط وتتآمر علي المصالح الوطنية

وتنفذ أجندة دولية ومؤامرة شيطانية

فكروا واستثمروا عقولكم لفائدة الانسانية

مش لمصلحة بشر وكيانات عدائية

اللهم احفظ مصرنا بقدرتك الربانية

الغائية

هي جت كده واللي عنده كلمة يلمها ١٠ - الغائية

بقلم/ عبد العظيم جاد عبد العزيز
مصر : ٤-۸-۲۰۱۳ - ٦:۰۸ م

النفاق في العصر الحديث سمة من سمات المدنية

هو اظهار بخلاف ما تبطن في نفسك الخفية

بس بيريح في التعامل المربح في مجتمع الحرامية

ويوصلك لأغراضك وتحقيق مصالحك الشخصية

وطظ في التعامل برقي وشفافية بطريقة انسانية

بيحللك الكذب والتزوير والتدليس بطريقة لولبية

المهم تحقيق الغرض على حساب المشروعية

واهدار حقوق الآخرين بطريقة فجة وغبية

الحق يمكن يخسر جولة في حياتنا اليومية

لكنه سينتصر بقوة وحتماً في المبارة النهائية


أهلاً تويتر أهلاً فيسبوك